باسم: اخويا و صاحب عمري , وحشتني جدا جدا جدا...مفيش يوم يا باسم بيعدي اللا لما بافتكرك... كل ذكرياتنا مع بعض بتتكرر قدامي يوميا تقريبا....ايام الحضانه لما كنا بنضرب العيال اللي يزعلوا واحد فينا .... بافتكر لما المدرسه طردتك و انا تضامنت معاك و خرجت معاك علشام معترض علي طردك ... خناقنا مع بعض و مصالحتنا و احنا صغيرين ... شكلنا و احنا ماسكيين في ايد بعض و رايحيين نلعب او رايحيين المدرسه .... شكلنا في صوره العيد و احنا صغيريين و لابسين نفس اللبس بس الوان مختلفه... تمشيتنا لما كبرنا في المعادي علي الكورنيش او في البلد او في ميت غمر مكان بيتكم القديم .... فرحتي بالاجازه علشان هتييجي تقعد معايا في البيت..فرحتنا بدخولك الجامعه و قرار تنسيقك في القاهره لان ده كان معناه انك هتييجي تعيش معايا .. مشاويرنا للجامعه مع بعض مع اننا كنا في كليات مختلفه بس كنا علي طول مع بعض ... اول شركه اشتغلنا فيها مع بعض و احنا في الجامعه .. شكلنا و احنا بنتعلم فيها .. مشاويرنا و احنا مع بعض فيها .... فاكر لما نزلنا اشترينا البيجر ده ... و فسحنا مع بعض في اسكندريه و العجمي و الغردقه...فاكر البنت الروسيه اللي انت كنت مصاحبها دي و انا كنت بضحك موت علي شكلك و انت عامل فيها رومانسي ... و انت كنت بتخاف عليا من موضوع المظاهرات و تتحايل عليا ماروحش ... لما خاله عرف اني اتقبض عليا و جيت معاه تاخدني...اول ما انا خطبت و كنت مش طايق التليفونات و انت ترد و تقول مش موجود .... فاكر لما اتخرجنا و كل واحد فينا اشتغل و نرجع بليل نخرج مع بعض .. فاكر اول ما بدات تشرب مخدرات و انا كنت زعلان قد ايه ... حاولت امنعك و اخليك تبطلها و اخليك تشوف مصير ناس حوالينا مستقبلهم ضاع بسببها ... بس انت كنت عنيد اوي يا باسم .. مش عايز تبطلها اصلا ... فاكر لما العيله عرفت و كل تفاصيل المشاكل اللي حصلت ... شكلك لما كنت بترجع البيت و واخد مخدرات كان بيقطعني لاني كنت بحس بفشل فظيع اني مش قادر اعمل حاجه ... لما دخلت المصحه و كنت باجي اقعد كل يوم معاك تقريبا ... شكل اعراض الانسحاب كانت صعبه جدا يا حبيب قلبي .. شاكلك مكانش بينيمني...لما خرجت و عرفت انك مش مبطل كان اسود يوم في عمري .... لما قولتلي انك مسافر تشتغل بره اتاثرنا اوي احنا الاتنين...كانت اول مره حد يسافر بعيد اوي كده عن التاني...مش عارف ليه كنت بسلم عليك و حاسس ان دي اخر مره هنشوف بعض...حتي مريم مع انها كانت صغيره اوي حست ان فيا حاجه مش مظبوطه ...كل ما اكلمك كنت باسالك انت راجع امتي و اخبار المخدرات ايه.. كنت بتقولي انك بطلت بس انا كنت عارف انك بتكذب ... دول عشره سنيين طويله جدا جدا.... لما قولت لي انك راجع مصر كان بالنسبه لي يوم فرح و لما رحاب قالتلي ان اليوم ده هنكون مسافرين مكانش عندي مانع اطلقها لو طولت معايا في الكلام ... لما صحيت يومها علي تليفونك بيتصل بيا خفت و لما رديت و لقيتها مراتك عرفت ان في مصيبه... نزلت و جيتلك علي طول .. فعلا كانت اخر مره اشوفك فيها يوم ما سلمت عليك قبل ما تسافر و احساسي اللي بقيت بكرهه اصلا طلع صادق تاني.... يومها قعدت معاك اكلمك انك لازم تبطل المخدرات ... نسيت انها خلاص كانت قتلتك ..... عمري ما حسيت اني حتي زعلان منك اللا النهارده يا خويا ... حسيت يومها اني نفسي انزل امسك كل تجار المخدرات و اعدمهم في ميدان من غير محاكمه زي الصين كده ... نعشك كان اتقل حاجه شيلتها في حياتي لسه حاسس بيه لحد دلوقتي .... الله يرحمك و يغفرلك ... بس انت وحشتني اوي في كل لذكريات دي.... بحبك
ليست هناك تعليقات:
إرسال تعليق