عزيزي اللي بيفكر في انتخاب موسي

عزيزي اللي بيفكر في انتخاب موسي اذا كنت بتفاضل بين موسي و شفيق فكلامي مش موجه لك لأنك اساسا ضد الثوره من بدايتها و بتفضل البقاء كعبد لا حقوق له اللا ما يلقيه الأسياد وليس لديك اي شعور تجاه الشهداء و لا تري تضحيات الشعب اللا كمحاولات شغب .. اذا لم تحرك انسانيتك صور الشهداء ولا إحساس ذويهم فلن تفعل كلماتي شيئا لأنك اساسا ضحيه نظام افسد انسانيتك و شعورك بالآخر و تركك مجرد كائن أنوي لا يهتم اللا برغباته و غير مستعد للتنازل عن مكتسباته من بقايا طعام السيد الذي سبق و ان ألقاه له بينما كنت تلحس حذائه ليرضي عنك ... كلامي بالتحديد موجه للناخب الذي لازال لديه بقيه إحساس بآلام مجتمعه و تضحيات أبناؤه و يدرك الظلم الذي تعرض له كل من عاش او انتمي لهذا الوطن بينما يشده صراع اخر برغبته في استقرار الامور حرصا علي مصالح شخصيه تريد ان تغلفها بمصالح عامه .. انتخابك لموسي معناه إعلانك عوده نظام مبارك بوجه اكثر تلونا و التوائيه .. متضحكش علي نفسك و تشوف فيه اي مميزات و تكلمني عن برنامجه او معارضته للنظام و مواقفه من امريكا او خبراته العربيه و الدوليه.. ناخدها واحده واحده؟ - برنامج موسي: اذا قرات برنامج موسي هتلاقي برنامجه زي كلامه مجرد موضوع تعبير و كلام مرسل من غير اي خطط تنفيذ ولا آليات واضحه و لا ضمانات لعداله اجتماعيه او كرامه مواطن او حريه تعبير ..برنامج موسي أشبه باعلانات الفنكوش .. دعايه ضخمه لمنتج غير موجود  - معارضته للنظام: اذكر اي موقف عارض فيه موسي نظام مبارك او اصطدم معه  الوزراء والمسئولين في الانظمه الفاشيه والمستبدة هم مجموعه من السكرتاريه مهمتها تنفيذ تعليمات القيادة العليا بالحرف و رفع تقاريرها بتأكيد تنفيذ التعليمات .. (أليس موسي من كان يقول في كل مناسبه تنفيذا لتعليمات الرئيس؟) .. اشعر انه اذا نجح شفيق او موسي انهم و بحكم العاده سيكون اول تصريح: أهدي الفوز للسيد الرئيس محمد حسني مبارك راعي الديمقراطيه في مصر.. و متحاولش تقنع نفسك بكذب الاعلام و خداعه عن معارضته له و ان خوف النظام من شعبيته جعلته يبعده عن وزاره الخارجيه .. الانظمه الفاشيه عند انقلابها علي احد رجالها فمصيره اما السجن او الابعاد عن الحياه العامه تماماً (راجع ما فعله النظام مع الفريق الشاذلي كمعارض او المشير ابو غزاله الذي خاف من شعبيته ونفوذه داخل المؤسسه العسكريه) هذا هو مصير من ينقلب عليه نظام كمبارك و لكن لا يرسله لجامعه الدول أمينا عاما .. لا تفكر في إقناع نفسك بقصه معارضته لأمريكا و اسرائيل و تعتبر ان قعدته واضعا رجل علي رجل امام مادلين اولبرايت المكرمشه او المسئولين الصهاينه ان دي تبقي معارضه (اسمح لي هنا اشتم في سري من صورلك المعارضه بهذا الشكل الانبطاحي المؤسف) و متقوليش ان دي سياسه دوله و هو كان مضطر (تذكر موقف اسماعيل فهمي وزير خارجيه مصر في عصر السادات اللي اعترض علي اتفاقيه السلام فاستقال ..هكذا تكون مواقف المحترمين و نظل نحترمهم حتي لو اختلفنا معهم)  اداء موسي في الجامعه العربيه: اذكر لي ماذا فعل موسي من إيجابيات خلال فتره أمانته للجامعه؟ و هل اصلا هناك اي قوه للدول العربيه حتي يكون هناك قوه لجامعتها؟ مهمه موسي في الجامعه كانت تنفيذ تعليمات و أوامر المستبدين العرب و ارضائهم جميعا فإذا كنت تبحث عن بهلوان لرئاسه مصر يتفنن في التلون و الالتواء لإرضاء الجميع فكان من الأولي انتخاب هياتم لرئاسه الجمهوريه كل ما حدث ان سكرتير مبارك الكفء اصبح سكرتيرا ل ٢٢ طاغيه و مستبد و فاشي عربي عليه ان يتحمل سخافاتهم و اهانتهم و يبتلعها ليظل في منصبه ... راجع موقف الجامعه الحقيقي من حرب العراق و لبنان لتكتشف عجز الجامعه و موسي بالتالي  فإذا كنت تري موسي شخص يستطيع التحدث امام الرؤساء والملوك فأحب افكرك ان نفس هؤلاء لازالوا يتذكرون اهاناتهم و ربما شتائمهم له و هو صامت فهل تعتقد انه يستطيع الان فرض احترامه بما يليق بمكانه رئيس مصر ؟  كل ما سيحدث في حاله نجاح موسي انك سوف تأتي لمصر بسكرتير لعدد اقل من ٢٢ طاغيه و مستبد حيث سيمارس نفس مهام السكرتير و الخادم ل ١٩ قاتل و مستبد هم اعضاء المجلس العسكري الذي سيكون الحاكم الفعلي لمصر ... فهل تري قيمه مصر ان يكون رئيسها سكرتير؟ اترضاه لبلدك ؟ :))  مش عايز أقولك تنتخب حد بعينه لكن حط قدامك حاجتين طالما مقتنع بالثورة اساسا - مطالب الثوره والتي ضحي الجميع من اجلها: كرامه - حريه - عداله اجتماعيه - حقوق الشهداء و مشاهد صورهم و شعور اهالي فقدوا أغلي ما لديهم  انتخب من تؤمن ان هذه المطالب تشكل أولوياته و ثوابته بكل صدق و ليس للمتاجرة و المزايدة .. انتخب بقلبك ثم عقلك 

مستغرب ليه من المجلس انت؟

هو بجد الناس مستغربه من موقف مجلس الشعب في واقعتي بكري و العليمي ؟ ليه انشالله ؟

ما نفتكر كده الاحداث اللي عدت علي المجلس من اول ما بدء الانعقاد ؟
- بدء المجلس جلسه حلف اليمين بفاصل من الكوميديا نتيجه لاصرار النواب علي اثبات وجودهم و حضورهم من اليوم الاول فاعتمد النواب الاسلاميين علي الظهور امام ناخبيهم و كانهم بيقولوا اننا اشد الناس حرصا علي الاسلام و ظهر نواب الثوره و كانهم بيقولوا اننا اكثر الناس ثوريه باختصار كل اختار المتاجره بما يعلم انه جاء به نائبا
- بدء المجلس اول جلساته بكلام عاطفي من اكرم الشاعر و دموع الكتتاتني كانت النتيجه ايه ؟
- استقبل المجلس دورته باحداث الداخليه و قمع الامن للمتظاهرين فعمل ايه المجلس ؟
مرت علي المجلس احداث بورسعيد فعمل ايه المجلس؟
- حدثت التجاوزات الامنيه بحق منظمات المجتمع المدني و كل من في المجلس يعلم ان هدفها اطلاق يد العسكر لتزوير انتخابات الرياسه فعمل ايه المجلس؟
- تابع قوادين المجلس رئيس الوزراء و وزيره التعاون الدولي و هم يوجهوا اتهامت بالعماله و الخيانه لمواطنين من دون دليل اثبتته النيابه و مع اعترافنا بوجود شبهات علي بعضها و هو الذي كان يعمل في ظل الحكومات السابقه و التي يمثل من يقف الان يوجه اتهامات احد اعضائها فلم يقف احد منهم ليقول له و اين كنتم في السنوات الماضيه ..؟
- تابع اعضاء المجلس فضيحه سفر اعضاء المنظمات الاجانب و قرار الافراج عنهم فماذا فعلوا اكتر من الصراخ و العويل ؟
- حدثت كارثه بورسعيد فماذا فعل اعضاء المجلس و لجان تقصي حقائهم اكتر من الصراخ و الظهور في الفضائيات ثم فوجئنا بنواب بورسعيد لا يشغلهم كارثه سقوط شهداء و فقد ام لولدها اكتر من انشغالهم بقصه هبوط فريقهم مما يكشف اهتمام هؤلاء بعصبيات الجماهير اكتر من اهتماهم بتنفيذ القانون

كم نائب ناقش قضيه جماهيريه و طالب او قدم حلول قابله للنقاش فيها ؟
هل في اي نائب اتكلم عن قضيه البطاله و اعتبرها قضيه مصيريه ؟ هل هناك من تحدث عن حل عملي لمشاكل الشباب لايجاد سكن و تدبير نفقات الزواج ؟ هل تحدث اي نائب عن مشكله التعذيب في السجون ؟ المحاكمات العسكريه و اوضاع المسجونين عسكريا بعد الثوره او قبلها ؟ هل تسأل اي نائب عن الوضع في المستشفيات الحكوميه و مدي سوء الخدمه التي تصل لاهانه المريض الفقير؟

القضايا التي حصلت علي اهتمام داخل المجلس و مناقشات كلها لا علاقه لها بهموم المواطن المصري و الامه الذي تحمل كل شئ قبل الثوره و كل الضغوط بعدها و هو يحلم ببلد يعامله كمواطن و يقدره كانسان.. انشغل المجلس بقضايا عنف المتظاهرين لا من باب محاسبه الداخليه و لكن من باب المتاجره و المزايده فذهب مدعي الثوره لاسلوب الخطب العنتريه ليظهر امام ناخبيه انه الرجل الثوري الحق بينما لجاء المهتمين برضا العسكر الي التشكيك في كل الحقائق و نفي اي اتهام لينال رضا النظام الذي يسعي لارضائه فلا احد منهم اهتم بالقانون و لا بحقوق مواطني بلد مصلحته الشخصيه هي المحرك الاساسي

انشغل المجلس بقضايا سب العليمي للمشير و انف البكليمي و كدبه و لم ينشغل بقضيه طوابير العيش و انابيب البوتجاز اللا علي استحياء و دون حلول جذريه ؟

خرج علينا نائب ليطالب بخفض سن الزواج في مجتمع يعاني من العنوسه بين الجنسين .. و هو مؤشر علي انفصال النواب عن معاناه الشعب و مشاكله الحقيقيه

قامت ثوره الشعب مطالبا بالحريه و الكرامه و العداله الاجتماعيه في هتافه الرئيسي فعلي مدعي تمثيل الشعب اما اتخاذ خطوات حقيقيه لتحقيق طلبات ثوره شعب و اما يعترفوا انهم ليسوا اكتر من وجه اخر لنظام قديم منفصل عن شعبه مشغول كل منهم بمصالحه الشخصيه و اللا فعلينا انتظار ثوره اخري علي كل تجار الثوره و زبيب الصلاه

مساهمه حسان في سرقه الفقير

الفيلم الدائر حاليا بين النظام المصري حكومه و عسكر من جهه و بين امريكا من جهه اخري حول موضوع المنظمات يذكرني بمشاهد الخناقات المصطنعه في السينما المصريه القديمه .. كل المطلوب تلميع البطل و اظهاره قوي و شهم

بدات القصه بخبر اقتحام امني للعديد من مقرات المنظمات الحقوقيه و الانسانيه العامله في مصر من سنوات بحجه قيامها بمخالفه القانون. و بعدها بدأت التمثيليات مشابهه بمعارك الطوخي و فرقته في افلام المقاولات الرخيصه

تلقي طبالين الاعلام التعليمات و بدأو في تنفيذها فقامت قوات النهش الاعلامي بتوجيه الاتهامات الي منظمات حقوق الانسان و بدء فاصل من المزايدات و الاستعراضات الوطنيه التي ذكرتنا بخطب عبد الناصر و القذافي الاعلاميه

و تسابق رجال النظام و عازفي الصاجات من اعلامييه الي لعب دور البطوله و الوطنيه لدرجه ان حتي فايزه ابو النجا هاجمت تلك المنظمات و اتهمتها انها كانت تمارس الضغط علي الحكومه المصريه... نسيت فايزه انها كانت من نفس هذا النظام لسنوات طويييييله جدا جدا .... هل هو الزهايمر ؟ هل نسيت فايزه ابو النجا انها كانت عضوه في اكثر من منظمه ؟

الفكره كلها ان النظام الضعيف بعساكره و سياسييه وجد انه لا يتمتع باي ثقه و وجد نفسه مسئول عن العديد من الجرائم و السلبيات فلجاء للحيله القديمه الجديده في البحث عن خطر وهمي و لعب دور البطل و لو بالتزييف و اتهام الابرياء و لا استبعد اطلاقا مشاركه النظام الامريكي في هذه التمثيليه الرخيصه... النظام الحالي بعساكره و سياسييه و قوادييه هو اكبر داعم لامريكا و محافظ علي مصالحها و مصالح اسرائيل فلا مشكله اطلاقا عند الاداره الامريكيه اذا ما شاركت في تمثيليه تظهر النظام المصري بجرائمه و اخفقاته و فلوله كنظام مقاوم للهيمنه الامريكيه و هو مفتاح حساس عند عموم الشعب المصري الذي يتمني رؤيه حكامه في موقف قوي بعد سنوات الركوع و الانبطاح امام الاداره الامريكيه و الاسرائيليه فوجد الأن ان نظامه يرفض و يواجه و يتحدي امريكا ...يا سلاااام و كمان بيهدد ان ممكن يستغني عن المعونه

هنا يظهر الجزء الروحاني في صوره شيخ محمد حسان فيخاطب الجزء الباقي في الشعب الذي لم تمسه لعبه الممانعه و الكرامه من نظام فاقد للاحساس و الكرامه و القدره ليخاطبهم من مكانته كرجل دين يحظي بمصداقيه كبيره فيخرج الينا معلنا عن استعداده لجمع مبلغ المعونه في وقت قصير ..... يا سلااااااااااااااااااام.... و معملهاش قبل كده ليه و للا اكتشف فجأه ان مصر بتاخد معونه من امريكا ؟ و اذا كان الشيخ حسان يستطيع جمه مبلغ كبير في وقت قصير الم يكن اولي به ان يجمعه لاقامه مشروعات تحل مشكله البطاله او انابيب البوتجاز او حتي رغيف العيش او ينشئ بها عدد من وحدات غسيل الكلي ؟

استعان النظام المصري بكل الاسلحه الاعلاميه و الدينيه لتلميع صورته و وجد في المنظمات الحقوقيه و الثوار بديلا مقنعا لايران و الاخوان و النظام دائما يتميز بالغباء حيث يربط بين اتجاهات مختلفه المصالح دائما... لم يسأل احد من طبالين النظام يوما ما الذي يمكن ان يجمع بين ايران و الاخوان المسلمين حتي تهتم ايران بوصولهم للحكم ... و ما الذي يتميز به الثوار و المعروف بميل معظمهم للتيارات اليساريه حتي تحاول امريكا دعمهم؟ ما الذي سيقدمه اليسار لامريكا و يحرمها منه النظام الحالي الذي تربي معظمه علي مبدء الطاعه  للاراده الامريكيه و الجالس معظمه حتي الان علي رجلين الامريكان..

طيب بما انكوا عايزين تعملوا رجاله بقي احب انضم لكم و اطالب بوقف المعونه و اطالب الجيش المصري اللي حسان بيشحت عليهم انهم يعلنوا استعدادهم لوقف المعونه و الاعلان فورا عن اجراءات تقشفيه تتمثل في خفض النفقات الترفيهيه و مرتبات كبار قاده القوات المسلحه (ميزانيه الجيش المصري طبقا لدراسه سنه 2003 كانت 14 مليار دولار) منها 2,7 مليار عباره عن نصيب الجيش من المعونه الامريكيه بينما يذهب 815 مليون دولار للمشروعات الاقتصاديه بينما يبلغ الناتج القومي لمصر حوالي 200 مليار دولار اي ان المعوونه الامريكيه الزعومه لا تمثل اكثر من 7% من اجمالي الناتج القومي.

الدعوي الموجهه علي لسان حسان لا معني لها اللا المتاجره بالبسطاء و محاوله رخيصه لاظهار النظام المصري الفاسد و المتورط في ممارسات اجراميه و داعم المصالح الامريكيه و الاسرائيليه الاول في المنطقه بمظهر البطل المقاوم..

اعلنوا عن تبرع فايزه ابو النجا براتب 3 شهور قبل ان تجبروا عمال المصانع علي التبرع باجر يوم واحد..ليعلن اعضاء مجلس الشعب عن تبرعهم بشهر من مكافأتهم (35000 جنيه شهريا للعضو) و يعلن اعضاء المجلس العسكري عن تبرعهم بثلاث شهور من مرتباتهم الخياليه قبل ان تطلبوا من موظف لا يكفيه مرتبه لاسبوع واحد ان يتبرع بقيمه يوم عمل لصالح مؤامره لتلميع فاسدين و اعطائهم صك صلاحيه لا يستحقونه

المواطن المصري يدفع ثمن كل الخدمات من ضرائبه و تبرعاته و لا يحصل عليها و اذا طالب بحقه فيخرج له النظام القمعي كلاب الحراسه الاعلاميه لتلقي عليه اتهامات بتعطيل الانتاج و عدم التقدير .....

ايها اللصوص : كفوا عن السرقه ليبني المصريين بلدهم و يمحوا اثار 60 سنه من الاحتلال المحلي

عايز تعرف مين عند الداخليه ؟

لو سعادتك محتار مين اللي عند الداخليه ممكن اقولك..

كل واحد من اللي ماتوا دول له قريب او اخ  بينهم مواقف و قعده حلوه و سهر و خروج و ذكريات سفر و صور و دولاب لبس مشترك تقريبا .. كل واحد من دول له جار و للا صاحب بينهم ذكريات سفر و فرجه علي ماتشات و لعب كوره لوش الفجر ليله العيد و بعدين يروحوا الصلاه مع بعض .. كل واحد من دول له شله جامعه و للا مدرسه بينهم ايام مذاكره و حواديت بنات و تغطيه علي بلاوي بعض قدام الاهل..

لما صاحبك و للا اخوك و للا جارك ده يبقي لسه مكلمك امبارح و يقولك انه مسافر الصبح بورسعيد عشان يشجع الفريق اللي بيموت فيه من هو صغير و يمكن راح الاختبارات بتاعته عشان نفسه يبقي لعيب كوره .. و اتفقتوا انه بعد ما يرجع هتتقابلوا عشان تخرجوا و للا تلعبوا كوره و يقعد يحكيلك الماتش كان في ايه و بركات عمل ايه و تريكه كان وحش و للا كويس

هتعمل ايه لو لقيت نفسك بتتفرج علي الماتش في التلفزيون و بعد الماتش لقيت ناس نازله الملعب و بعد 10 دقايق لقيت خبر ان فيه واحد مات ؟ اكيد هتحس بقلق علي صاحبك و اخوك اللي هناك ده .. اكيد هتمد ايدك علي التليفون و هتلاقيه مشغول لان اهله برضه بيحاولوا يوصلوله..هتحاول تاني و تالت لحد ما التليفون يرن و تلاقي قدامك خبر ان اعداد الضحايا بتزيد بشكل مش طبيعي  ... هتلاقي قدامك عساكر واقفين بيتفرجوا كأنهم عساكر أليين منزوع منهم البطاريات (هما فعلا منزوع منهم بطاريات الانسانيه) هيفوت عليك الدقايق كأنها سنين طويله و انت قاعد تكلم اهله عشان تطمن فيردوا عليك انهم سمعوه بيصرخ

صاحبك اللي كان معاك في التحرير و في محمد محمود بتهتفوا سوا يسقط حكم العسكر و انت شايفه مش خايف من الغاز و لا بلطجيه الداخليه انت متخيل شكله دلوقتي و هو بيتهاجم من حيوانات عشان سبب و لا هو عارفه و لا انت كمان...

هيفوت عليك الوقت كأنه سنين و انت نفسك تسمع خبر انه بخير .. شفت خبر ان الطيارات راجعه نزلت جري قابلت اهله و صحابكوا مستنين تعرفوا هو فين لفيتوا علي المستشفيات مالقيتهوش و كل مستشفي متلاقيهوش فيها يتأكد احساسك زياده اللي من صحابكوا نزل علي بورسعيد يلف علي المستشفيات بيكلمكوا برضه مش لاقيه ... مفيش قدامكوا اللا المشرحه ....

دخلت انت و صحابك و ابوه كل شويه يطلعلولكوا جثه متلقوش صاحبك لد ما يخرجلك جثه عرفتوها ...لقيت صاحبك اللي كان معاك امبارح واقفين بتتضحكوا و تتريقوا ميت قدامك ....منكم اللي اغمي عليه و منكم اللي بيحاول يسند ابوه و بتتعازموا علي بعض عشان حد يطلع يقول للواقفين بره

شريط ذكرياتكوا بيلف قدام عينيك ضحككوا و تريقتكوا علي موقف حصل او خناقتكوا مع عيال في المدرسه التي شيرت بتاعته اللي موجوده في دولابك عشان كنت عنده و عجبتك ...الهدوم اللي شفته بيها و انت لسه شايفها عليه الصبح و هو ماشي ...يمكن كنتوا شارينها مع بعض او عندك زيها ؟

هتعمل ايه ساعتها ؟

سمعت ان طنطاوي هيقابل اللعيبه اللي راجعين استنيت تشوف دموع في عينيه و قرارات تجاوبك مين اللي قتل صاحبك .. لقيته بيقول انه عادي و بيحصل في اي مكان ...هتعمل ايه ؟ لقيت اوساخ الاعلام بيتاجروا بدمه و بيطلبوا تعويض مادي له ..هتعمل ايه ؟ هو الصاحب بتعوضه فلوس يا ولاد الكلب؟

استنيت تعرف نواب مجلس الشعب اللي اختارتهم انت و هو هيعملوا ايه ... تابعت الجلسه و صدقت التمثيليات و استنيت للأخر و انت مستني قرار محاسبه مسئول و سحب الثقه من حكومه و محاكمه وزير مات 75 شاب بسببها و بفعل كلابها... خرج القرار بيقولك هنعمل لجنه لتقصي الحقائق ... افتكرت مصير شهداء حوادث الكنائس و ماسبيرو و محمد محمود و عملتلهم ايه لجان التقصي دي... فهمت انك عايش في بلد بيديرها مجموعه من المجرمين القتله و بيساعدهم مجموعه من تجار السياسه و الدين مسمينهم نواب مجلس شعب ...هتعمل ايه ؟

اعتقد ان اقل حاجه تعملها انك تروح و تقف في وشهم و تحدف طوب و تصرخ...عايز حق صاحبي يا ولاد الكلب....لما كمان بقي ولاد الكلب يضربوك يبقي طبيعي انك تحلف ما انت ماشي اللا لما حق صاحبك يرجع لان محدش هيجيبهولك يا اما تموت زيه اشرف..

كل اللي فات ده لو صاحبك .... ما بالك لو ابنك ؟ بتهيالي تفجر نفسك فيهم ....عرفت مين هناك ؟ انا رايح معاهم حتي لو مش عاجبك بس ارجوك متنضمش لقافله المزايدين و اقرأ الفاتحه له و لي انا كمان

ممن يحمي الاخوان مجلس الشعب؟

ما حدث امام مجلس الوزراء هو امتداد طبيعي لاحداث كثيره سابقه ادت جميعها لتراجع شعبيه الاخوان بشكل رهيب بين القوي الثوريه.. اعلم تماما ان كل اخواني سيقراء المقال هيعتبرني عدو او حاقد او جاهل .. مش مشكله .. معروف عن الاخوان بشكل عام و خصوصا من بعد الثوره ميلهم للاتفاق مع المجلس و لعب دور العاقل الواعي ... في الحقيقه ده مش لانهم ضد الثوره بالعكس لكن لانهم شايفين ان دور الثوره انها اتت بهم لمقاعد البرلمان و اجلستهم علي المقاعد امام النظام للاسف لم يدركوا بعد ان تغير موازين القوي اصبح واقع و ان الشارع اصبح قوه الضغط الاولي ... يدرك بعض شبابهم هذه الحقيقيه لانهم شاركوا في صناعتها من اليوم الاول و لا يدركها معظم شيوخهم ممن شبوا علي ضروره استخدام الحكمه مع النظام الذي يعلمون انه يملك القوه لقمعهم..

هؤلاء الشيوخ الان هم عناصر مؤثره في الجماعه و داخل مكتب الارشاد لايزالوا يتعاملون مع النظام بمنطق شعره من جلد الخنزير نعمه.. ما نستطيع الان الحصول عليه يجب ان نقبل امامه بتنازلات لا يدرك شيوخ الاخوان ان بامكانهم الحصول علي المزيد استنادا لقوه الشارع حتي الان هم ينظرون للثوره كعامل ادي الي ارتفاع سقف طلباتهم و ليس تغيير كامل في موازين القوي يؤدي الي امكانيه فرض ارائهم و التحدث من موقع القوه لا موقع الضعف من موقع فرض الراي لا من موقع المتلقي

انجرف شيوخ الاخوان في سعيهم لمهادنه العسكري لعداء القوي السياسيه الثوريه الحقيقيه فشعر الثوار بان ما قام به الاخوان يمثل طعنه خنجر في ظهورهم

بدء سيناريو استقطاب الاخوان بموقفهم من الاستفتاء ثم مواقفهم المتتاليه من اعتبار القوي الثوريه هي قوي معاديه للنظام و الشرعيه و اصبح خطابهم الاعلامي شبيه بخطابات الحزب الوطني و تلي ذلك مواقفهم و تصريحاتهم من اعتداءات ماسبيرو و حوادث الفتنه الطائفيه المفتعله و تصريحات بعض قياداتهم و موقفهم من احداث محمد محمود و حادث تعريه ست البنات ثم موقفهم من احداث مجلس الشعب كل هذا ادي الي خلق فجوه رهيبه يسئل عنها بعض التيارات الثوريه التي اسأت للاخوان و لكن يسأل عنها اكثر تنظيم الاخوان بمواقفه المتتاليه و قياداته بتصريحاتهم الغير مسئوله و لا مدروسه

بعد النجاح الساحق للاخوان في الانتخابات كان امامهم فرصه ذهبيه للم الشمل باجراءات جديه و ليس تمثيليات و تصريحات علي الورق كان ينقص ان يصاحبها صوره صفوت الشريف (احنا حاضنين الشباب) و اعتمدت القوي الثوريه برغم خلافها مع الاخوان علي شرعيتهم و طالبت باعطائهم الشرعيه نظير رحيل العسكر و حتي الاصوات الضعيفه القليله التي طالبت برفض النتائج قوبلت بهجوم شديد و اتهامات بموالاتها للعسكر و هو اتهام صحيح بالطبع

عندما تظاهرت هذه القوي يوم 25 للمطالبه برحيل العسكر فوجئوا ان الاخوان يرفضوا هذا الاقتراح متمسكين برحيل العسكر في الوقت الذي وعد به العسكر نهايه يونيو و برغم من ان العسكر ام يوفوا ابدا بعهد اللا نتيجه لضغط اللا ان الاخوان تبنوا هذا الاقتراح و ذهبوا بخطابهم الاعلامي الي حد اعتبار ان من يريدون تسليمهم السلطه هم اعداء للشرعيه و حاقدين عليهم و حدثت خلافات كبيره في الميدان نتيجه لاصرار الاخوان علي الاحتفال في ذكري يوم سقط فيه شهداء وجب عليهم احترام القوي الموجوده اللا ان تجاوز البعض من الشباب دفع الاخوان الي اعتبار منصتهم رمز وجب حمايته بدروع بشريه ضد رفاق الامس حتي لو اعتبر الاخوان ان المتظاهرين الذين هاجموهم ليسوا من ثوار 25 الشرفاء فايضا وجب عليهم تذكر انهم انفسهم ليسوا اخوان 25 الشرفاء

الخطاء الابشع من وجهه نظري كان يوم 28 عندما فوجئت المسيرات القادمه للبرلمان للمطالبه بتسليم السلطه للاخوان بدروع بشريه ممن ادعوا انهم شباب الاخوان لمنعهم من الوصول للبرلمان .. هل البرلمان اهم عند الاخوان من شباب مصر و نسائها المقتولين و المسحولين و المتعرين في محمد محمود ؟ فلماذا لم ينزلوا وقتها لعمل الدروع البشريه التي يدعون الان بعملها لحمايه مصر ؟

ممن يحمي الاخوان المجلس؟ هل من المتظاهرين ؟ الذين هم قطاع عريض من القوي الثوريه شاء الاخوان ام ابوا اذا فهو اعتراف من الاخوان بعدم شرعيه المجلس بالنسبه لهؤلاء و هو امر في غير صالح الاخوان اذ يساعد علي مفهوم التقسيم الذي يدعي الاخوان رفضه ..

علي الاخوان التفكير في مراجعه خطابهم الاعلامي و مواقفهم ارفض اتهامهم بالخيانه و اعتبارهم الوجه الجديد للحزب الوطني و لكن عليهم ايضا ان يبذلوا مجهود اكبر في ادراك حقيقه ان شرعيتهم و حمايتهم في يد الشعب و الذي تعتبر القوي الثوريه جزء اساسي منه ..اللعب علي اكثريه الاغلبيه الصامته لن يفيدهم مطلوب عودتهم لصفوف الثوره و ادراك ان وجود الثوار في الشارع عامل ضغط لصالحهم عليهم استثماره و ليس استعدائه

ياليت قومي يعلمون

كيف فكر الكتاتني عندما ارسل برقيته ؟

قبل ما حد يقوللي انه اترحم علي الشهداء و انه وعد باستكمال الثوره هقولك لو سمحت بطل فكره الخضوع و الرضا بما يلقيه اهل الحكم دي لانه اصلا مكانش يقدر يعمل حاجه تانيه غير كده... يعني سيادتك مثلا كنت متخيل امه ممكن يقول .. اننا ندين اعمال التظاهر و الوقفات الاحتجاجيه و ان من قتلته الداخليه لا يعتبر شهيد؟ مش ده موضوعنا عموما .. خللينا في موضوعنا .. كيف فكر الكتاتني؟

هل فكر بطريقه الجماعه التي خرجت للنور و التمكن اخيرا من الحصول علي حقها الطبيعي في التواجد الشرعي و الحصول علي اعتراف النظام بها في حقها في ان تكون الجماعه مشهره بشكل علني و حقها في ممارسه العمل السياسي عن طريق انشاء حزب قام علي مبادئ الجماعه و بالتالي اراد توجيه الشكر للمجلس العسكري الذي ادار مرحله بعد الثوره و التي اتت بنتائج يري التيار الديني انها في صالحه ؟

ام فكر بطريقه السياسي الذي ينظر للمجلس العسكري كقائم بمهام رئيس الجمهوريه و الذي قام باتخاذ خطوات جاده لنقل السلطه للمدنيين طبقا لما وعد به ؟

في كل الاحوال لم يفكر الكتاتني بعقليه الثائر و لا بقلب أب فقد ابنه ..
ممكن سيادتك تشوف ان مش معقول السياسي يفكر زي الثائر لان الاعلام اقنعك ان الثائر ده بلا عقل و يتصرف بعشوائيه .. يؤسفني ان اصدمك في معلوماتك لان الثوريه لا علاقه لها اطلاقا بمبدء العنف و اللا اعتبرنا ان رجال الداخليه و الجيش في مصر من الرموز الثوريه .. كان علي الاقل الواجب علي الكتاتني ان يفكر بمنظور الثائر الذي تحمل مشاهد الدماء و عاش المواجهات من اول 25 يناير الي موقعه مجلس الوزراء و تحمل كل هذه المخاطر و الالام و فقد الاصدقاء و الم الاصابات حتي يجلس امثال الكتاتني علي مقاعد المسئوليه .. الا يستحق هؤلاء ان يراعي السيد رئيس المجلس شعورهم ؟ هل توجيه برقيه شكر للمجلس العسكري و هو المسئول امامنا عن كل اعمال القتل و الاصابات و الانتهاكات التي قام بها النظام من بعد تنحي مبارك و حتي الان ... هل سياده الرئيس لا يعرف بهذه التجاوزات ام انه لا يري فيها اي انتهاكات ان انه من اصحاب نظريه الطرف الثالث ؟

لم يفكر الكتاتني حتي كأب فقد ابنه او أم لن تري ابنها مجددا و لا فكر في ألم امراه سحلها كلاب الامن و عروا جسدها و لم يفكر بعين احمد حراره و التي تسبب المجلس في حرمانه من ان يري بلاده بعدما ساهم في تحريرها لان المجلس ترك كلب برتبه قناص في محمد محمود يطلق رصاصاته علي شباب مصر المطالب بالحريه و الكرامه .. كان علي الكتاتني ان يفكر فيمن اتوا به رئيسا و بحزبه في السلطه و بنوابه في البرلمان

برقيه الاعتذار هذه تعتبر اول هديه موجهه من السلطه المنتخبه لحقوق شعب .. اول انتهاك سافر لحق الشهداء و الممصابين و المظلومين .... طبعا انا في انتظار اللي هيطلع يقوللي ما هو برضه اتكلم عن حق الشهداء و ان الثوره مستمره ...معلش حضرتك فكر زي ما انت عاوز و معاك حق انه اتكلم لكن يفضل برضه ارسال برقيه لمتهم بالقتل مع التاكيد علي حق المقتول شئ غير منطقي و لا انساني و لا يليق ببرلمان أتت به ثوره شعبيه و عليه ان يدين بالولاء لشهدائها و ابطالها و ليس لقاتليهم ... لماذا لما يقدم برقيه ايضا للداخليه لدورها في انجاح العمليه الانتخابيه .. اللي هيقوللي ده البروتوكول هقوله لو سمحت هاتلي من البروتوكول اللي بيقول كده تاني حاجه احنا في ثوره ثوره ثوره افهمهالك ازاي انا ؟ يعني الثوره اللي قلبت نظام و بتحاكم رئيسه طبيعي انها تقلب ام البروتوكول ده .. طب و ليه المجلس العسكري لم يوجه الشكر لمبارك كمان بحكم البروتوكول و القواعد دي ؟

اللوم هنا مش علي الكتاتني لوحده و لكن علي كامل اعضاء المجلس المحترمين الموقرين استثني منهم مصطفي النجار الذي سجل اعتراضه في موقف يراه البعض بطولي و اراه طبيعي جدا و لا يحتاج حتي للشكر .. نريد معرفه اسم كل من وافق علي هذه البرقيه التي وافق عليها المجلس بالاجماع حتي نعرف كم نسبه النواب الذين سيقفون في صف الشعب اذا تعارضت مصالحه و حقوقه مع رغبات النظام ... اعلنوا اسماء شاكري القتله حتي يعرفهم الشعب..... اعرف نائبك و علم عليه

هل احنا شعب فوتوشوب ؟

اللي يتتبع احاديث و تصريحات المسئولين في مصر يكتشف بوضوح  انهم اما بيتكلموا عن شعب تاني غيرنا و عايشيين في بلد غير اللي احنا عايشيين فيها دي و اما ان احنا اصلا مش موجودين و بيهيأ لنا و اذا استرجعنا تحليلات طيب الذكر عمرو مصطفي عن ان صور استخدام العنف من الجيش ضد المتظاهرين انها فوتو شوب  و اتهام نواره و طارق بتهم ايهام الراي العام و ما تلاها من انكار المسئولين لكل ما نراه يوميا من قمع و سحل و قتل و احداث هزليه... لذلك فعلينا ان نشك اننا شعب فوتوشوب ..

قتل الالاف امام اعيننا برصاصات عن بعد و خرج علينا بعدها العيسوي معلنا بكل ثقه ان ليس لدينا قناصه و لم نطلق رصاص حي علي المتظاهرين يبقي اكيد احنا ناس فوتوشوب

صدرنا باظ من كم الغاز اللي انضرب في محمد محمود و برضه طلع علينا فلته العصر العيسوي موضحا ان الداخليه لم تطلق الغاز يبقي كمان صدرنا فوتوشوب و عنده تهيئات

الزحمه ماليه الشوارع بشكل غير مسبوق و اقل مشوار بياخد ساعتين تلاته و يطلع  مدير مرور العاصمه يقولك ان حركه السير طبيعيه يبقي عليك انك تصدق الحكومه و تعرف ان العربيات اللي قدامك دي مش عربيات و لا حاجه دي فوتوشوب عشان توهمك ان الدنيا زحمه

تلاقي طوابير العربيات واقفه قدام البنزينات عشان مفيش بنزين في البلد و تلاقي عبدالله غراب طالع يقولك ان مفيش ازمه و ان دي اشاعات يبقي تفهم ان البنزين موجود و الناس دي واقفه بتستهبل من الفراغ اللي هي فيه او ان العربيات دي برضه فوتوشوب

في بلد مثل مصر يسيطر عليها حكم فاشي و قمعي متحكم في كل قلم صحفي و كل كاميرا و ميكرفون اعلام فمن الطبيعي ان يكون الاداء الاعلامي لا علاقه له بالمهنيه و الاحترافيه فهو لن يصبح هدفه الوصول للحقيقه و عرضها من وجهه نظره و لكن سيكون هدفه تنفيذ تعليمات السلطه .... لن تجد مسئول يجرؤ علي قول الحقيقه كامله و لكنك ستجده علي اتم الاستعداد ليكذب و يصدق كذبه حتي يستطيع الاحتفاظ بموقعه ... فالجهاز الحكومي و الاعلامي ملئ بهؤلاء المستعدون لبيع شرفهم ان لم يكونوا باعوه بالفعل من اجل الاحتفاظ بمنصب تافه او ترقيه حقيره تنقله لمكتب مستقل بتكييف

حتي لا تذهب عقولنا فالاسهل ان نصدق اننا شعب فوتوشوب و ان هؤلاء المسئولين ينتمون اساسا الي عالم سمسم